電腦最新情況

電腦的中毒問題已經演變成要重新安裝整套軟件。。。事態變得較預期嚴重，所以我只有寫上我的近況唔回應喇。。。因為我唔知今次中嘅毒會唔會因為我的問題而傳開俾我回應嘅網友，雖然機會唔大但我都唔想，希望關心我嘅網友們唔好介意。 

因為我實在唔知亦唔識有D乜文件或軟件可以保留（害怕保留咗D有毒嘅文件或軟件）所以只有等王子返家先整，要等到四月底，五月初。。。左右，另外而家係花粉季節，對於我呢種乜都敏感一餐嘅人嚟講係絕對痛苦嘅季節。。。我已經敏感塵，加上味精，再加上花粉，我相信我嘅咳同流鼻水，鼻塞等問題只有越來越嚴重。。。有時真係希望切咗自己個鼻出嚟咁就解決好多問題喇。 

至於條腰，可以活動等仍酸軟，不過我仲擔得抬得D較輕嘅物件。。。okay冇問題。 

今晚要開長途車，半夜開始，總共要開超過四百哩，大約來回需時共九至十小時，帶公主去王子學校做校訪，所以我明晚唔會寫啦，遲D見！！！ 

汶汶， 你嘅身體點呀。。。個頭傷風呢頭又有低血壓。。。你要保重呀。。。唔舒服就請假喇。。。瞓多D呀。 

好感恩的小蜜蜂，唔好為其他人影響自己嘅心情，你做咁多好事，所以你有咁多網友支持你，你要繼續努力，做好事存好心，唔好要我地班網友擔心你呀。 

雲淡風輕，知道Music唔駛開刀真替佢／你開心  ，而家Music情況好D未？？食得落貓糧？？仲要打幾多日針？？外婆身體如何？？ 復活節喎，有冇帶小朋友出去玩吓，又或者買復活蛋佢地食？？   

心曲，多謝你D朱古力，好正好味呀。。。你最近身體如何？？唔好捱壞自己呀，多D休息，okay???   

大陳，知道你嘅血小板指數相當理想，我好躉你高興。。 。 你要持續做你嘅步行功，唔好放棄，至於瘀血，試吓食多D黑木耳，幫助散瘀血架。 

MeiYu，我暫時唔去你個網送花俾你喇。。。不過我係度一次過送個大大個俾你，等你開心到呢個月底，okay?? 

其他到訪嘅朋友，我都希望你地大家日日身體健康，日日開開心心，我會繼續日日放D我認為值得睇嘅文章大家分享。    

感恩節

心存期望，因為他的答案一直是"冇諗過"，"我唔知"到因為我開始埋怨佢嘅不知所謂之後而講嘅"離婚喇！"，我仲喺認為佢喺意氣用事之說，今日感恩節；在美國傳統，一家人應該敘在一起食火雞餐，在幻想著還有最後希望，因為對佢仲有愛同感覺，而佢亦好似處處關心著我，我打電話俾佢問最後最深入的問題；點解"我唔知"，點解從未為網上愛人事件而道歉和說"對不起"，答案如下：
1。 我同佢之間冇發生任何野，況且已經事情已經發生好耐，唔覺得做錯，所以唔會講"對不起"
2。 我有送花，送禮物給你，喺你唔記得
3。 我心中亦有一條刺；同王子公主關係唔好，因為溝通唔到，因為你同佢地講英文
4。 我搬出去的時候喺好想返嚟，但喺你一直個嘅兩個星期咁，打電話俾我迫我，令我越行越遠
於是我問咗個歸根究底嘅問題；你仲愛唔愛我；"冇，我唔再愛你"，我馬上的反應"你講大話"，答案喺"冇，我唔再愛你"，"你喺真心個句？"，"係，我唔再愛你"，我D眼淚開始不受控制"點解唔早D講，我仲愛你，所以一直俾機會你","你真喺仲愛我？"，當我嘗試解釋時，佢話唔想再聽再講就掛斷電話，過咗大約十分鐘，我打俾佢，同佢講完我之前未講完的表白，同埋以後同佢再唔想有任何接觸(唔想因為聽到佢把聲音或見面或同佢有關人和事時令我崩潰做傻事)等等，就在我放低電話個一刻，我不受控制地喊，喺狂喊，公主首先攬實我同我一起喊，緊住連冷冷的王子亦主動攬實我，但喺我就仲喺感覺唔到溫暖，繼續狂喊，到我有意識時，我馬上收聲話冇事，但喺眼淚還不斷咁流。。。。

現在喺凌晨四點幾五點，由尋晚午夜開始只喺睡咗兩個鐘就再睡唔到，已經唔知喺第幾晚係咁，淨喺知道我已經由127磅重到現在114磅。。。。一路走肉行屍咁過咗兩個月兩日。。。仲要痛嘅耐呀？？？好痛呀！！！！！

幻想

尋晚睇個套"珠光寶氣"劇集時(第二十六集)，覺得康雅瞳(蔡少芬)同康雅思(黎姿)嘅對話好啱，"醒唔醒都好，我唔會再等佢嘅電話。。。黑咖啡好，提醒自己，唔好以為可以喝甜嘅，做人就唔會苦。。。。我寧願佢實實在在咁同我講，"我地冇啦！"好過而家咁。。。 只喺一句，無論佢真心定喺被迫，我亦唔在乎佢可唔可以騙到我，我只喺想俾一個藉口自己，話俾自己聽，個男人都開咗聲，要分手就喺要分手，唔應該再俾自己幻想。。。。"以上嘅對白就好似同我講咁，馬上想寫低佢，咁就可以時時刻刻提醒自己唔好再有幻想，因為整件事情已經對王子同公主有一定嘅影響，我真喺好心痛，自覺好無用，冇好好俾個健全嘅家佢地，只希望我能盡快治癒，就當所有嘅事都喺我錯；

1。我唔應該改變佢如廁嘅習慣，我應該做清潔嘅工作，唔應該抱怨。
2。我唔應該同王子公主講英文，令佢無法同佢地溝通。
3。我唔應該放時間喺王子公主身上。
4。我唔應該關心遠在香港唯一的細佬。
5。我唔應該照顧患病嘅媽媽（事實上，我嘅母親大人真喺世間少有咁難頂同麻煩）
6。我唔應該令佢曾經愛上網絡上的女人。。。等等，

所有野都喺我嘅錯，我應得而家咁嘅結果。。。

我係度埋怨？係。。。 我好唔開心？係。。。。。我可唔可以做D野？試過。。 但喺只喺單行道，所以我唯有繼續向前走。。

離婚

今日十一月二十六日是個個該關心或問候我的人搬離開兩個月了；他曾說過一個月後會討論我們的問題，但在多次的電話後，變成兩個月，今晚曾猶豫該不該問佢，而咁啱王子今晚回宮，所以多次聯絡，最終都是問了，而他的答案是"你話開始起牆保護自己嘛，就咁下去啦，至於我，我唔知"呢個答案就喺我等咗兩個月，多次俾機會的答案...??心好痛。。。 好痛。。。好痛。。。跟住就喺憤怒，連自己想唔想回家都唔知？？連我只係建議嘅三個積極解決問題的方法都做唔到(1.為網上戀解釋和道歉以增加我對佢嘅信心。2.一日一電以了解對方-只有一日一電報告。3.與子女多溝通)，我本來諗住如果佢做到，只要做到以上三點，我可以改變自己-多重視佢，多聆聽佢嘅心聲，對佢溫柔D，以改善我哋嘅關係，但喺佢嘅答案喺一次又一次令我知難而退，喺，我知難而退，我好疲倦。。 "我唔知"呢個答案係對等咗兩個月嘅人嚟講喺打到我遍體鱗傷，我放棄！

超辣

今日，一如以往的星期日，雖然仲病緊（咳同流鼻水；因鼻竇炎流到喉嚨個種，所以咳得仲緊要。最慘喺我已經分唔清係普通流感定係敏感引起）但係我都一早車公主去上中文堂，之後諗住去同個雪櫃上倉。
楂車路上都OK，但中途突然打咗個大噴嚏然後感到甚至於聽到腰下方「格」一聲，知道大鑊但因為冇地方痛所以不以為而，到落車時由架車座企起身條腰就痛到差D跪底，個陣時真係好驚，得我一個人點去接公主，點返屋企，點返工.....萬千個點算？？？？有馬上諗起個個該關心或問候但又好耐冇來電關心或問候我的人，但係我即刻話俾自己聽-佢都冇來電關心或問候我，即係當我從未喺佢生命中出現過，我做乜而家打擾佢嘅平靜呢？諗到依到我即刻努力撐起身，自己壓直自己條腰然後一拐一拐咁完成購物行動。緊住到教堂接公主時碰到好友先至由佢幫我推直條腰，最好笑係當佢推嘅時候佢聽到「卡」一聲嚇到佢以為整斷我條腰，搞到我鬼咁唔好意思嚇親佢。
終於返到屋企由公主呢位熟手技工幫我又踩又搥又推先至好D，而家仲有一個暖水袋黐住條腰，但係仲係好痛。。。 唉點算好？？？
雖然好似日日都冇乜好事發生，但係終於有一件-有人可以幫手帶媽咪D癌藥返香港，唔使冒險寄返去，算佢好彩！！

一個不一樣的星期六

 

屬於病人的我，今日由朝早十點到黃昏六點不停地教了三班心珠算的學生，真係教到我口軟，腳軟，腰到斷，喝完學生仲要招呼家長，你都咪話呢份散工易做，如果唔喺應承咗人真係唔會咁作賤自己。

跟住我的好友打俾我想我係佢間託兒中心幫手搵D耶教，於是諗到同心珠算合作希望幫到我既好友搵多少少外快幫補下，點知心珠算個老板話唔識唔合作，唉，依家個頭簡直濕到漏，都唔知嘅時先會乾。

好彩返到屋企只要整翻熱D菜煮個飯就食得，如果唔係食cereal就算喇。

跟住上網諗住玩陣無聊嘅網上遊戲就訓點知手癢想整靚個私人BLOG就用咗五粒鐘去搵 Flash 時間＆日期,點知搵到都係亞洲D時間＆日期，搵唔到紐約嘅，功虧一簣，冇陰功！！

跟住上網諗住玩陣無聊嘅網上遊戲就訓，點知手癢想整靚個私人BLOG就用咗五粒鐘去搵 Flash 時間＆日期,點知搵到都係亞洲D時間＆日期，搵唔到紐約嘅，功虧一簣，冇陰功！！

最慘烈嘅就係個個該關心或問候但又好耐冇來電關心或問候我的人，居然只喺IM提醒我要較慢一個鐘（US冬令時間），真係有心！！