仍然有低燒

大陳講得正確，小病是個信號，是我的身體告訴我「喂，你唔好用到我咁盡喎，我就嚟頂唔順喇！」，所以由星期五到星期日朝，我幾乎係嫁咗俾張床，其實應該係D止咳藥令我昏昏欲睡，好彩仲識起身整晚餐俾公主，不過我就冇乜胃口喇，因為喉嚨仲好痛，成個人仲係好唔舒服，對眼好熱咁一直發低燒。到今朝，情況仲係咁，但因為公主要考試，一早要出門，冇辦法，頂硬上，一到目的地等公主考試個三個小時嘅時候就一直瞓，真係唔知我點可以順利開個45分鐘車而又冇意外。。。一額汗！！

後來，我都係打電話俾個家庭醫生，問佢我係唔係患咗豬流感（H1N1），醫生就話如果係我就應該去買六合彩（俾佢激死！）。佢話可能今次我太勞累，所以D抗生素有效得比較慢，要我食退燒同止痛藥，唔掂再搵佢。Okay，你係醫生，我唯有聽話。

剛食完外賣晚餐準備食止咳、退燒同消炎藥，知道要昏迷，所以馬上寫網誌告訴大家我的最新情況，以免你地擔心。

汶汶，請放心，我會保重自己，唔單止因為我仲要去上海送皇太后最後一程，我仲有兩個公主同王子要照顧嘛，所以請放心。你都要小心身體，好好養精蓄銳做個靚靚奶奶呀！

雲淡風輕， 多謝你的祝福和保佑，你D小朋友點呀？祝你與家人有一個愉快的一週。

Mei Yu，一直唔記得問你份新工作如何？？D同事對你好嗎？你開心嗎？

好勤奮的小蜜蜂，我已經由香港返咗紐約差不多一星期喇，我會快D好番，因為實在好耐冇去探訪你地D網誌喇。

如果呢段時間我有錯過回應任何一位網友，請包涵包涵！！
送上一首靚歌，希望大家與家人係未來的星期裡開開心心。