羅蘭 - 信命不信運

她很紅，卻很窮。羅蘭笑說，自己的財運差到不得了，「幾乎買乜都輸！」
TVB台慶，人紅有樣睇的薛家燕、黎耀祥都中過大獎，但羅蘭連濕碎獎都無緣，「
我在無綫三十幾年，一次細獎都未中過。」

羅蘭住旺角太子道，那一輩的明星，似乎特別鍾情九龍西，如何文田、太子、窩山，
「方便嘛，返電視台、去片場都快，我咁多年就算換樓都係住這一區。
不過最初買樓，都是媽媽話事的。」其母94年離世，她也沒再搬過家了。

雷曼拖累蝕老本

九十年代爆發移民潮，羅蘭跟大隊入紙移民加拿大，並獲得批准，
「我哋兩母女經歷過打日本仔的時期，好擔心又要打仗。阿媽當年帶住我走，
但到九七後，我六十幾歲仲點帶住九十幾歲的阿媽走難？於是想移民。」

未幾，母親健康急轉直下，至94年離世，最終沒等到回歸，「阿媽走咗，我得番一個人，
就無需要移民了。」那時眼看樓市起起落落，她倒有點懊惱沒有多買一層樓，
「我在投資上總是冇運、冇眼光，七十年代股災，我輸咗好多好多錢，我當時唔識股票，
都係聽人講。到香港回歸前後，我放棄移民其實可以買吓樓，偏偏我又冇買。」

她偏好投資基金股票，08年雷曼爆煲，羅蘭姐的老本當然也被燒到，「我冇買雷曼，
只是買了歐洲基金，仲有股票，但都受拖累跌晒價，家惟有放埋一邊。
其實老人家本錢有限，都係想收吓息，點知都咁困難。」

不過，篤信天主的「聖羅蘭」認為一切自有安排，姻緣如是，財富亦如是，
有時天降橫財，亦可能無福消受，「電視台有個道具部的員工，有次中咗幾百萬，
自此以後，個心成日跳，有錢係咪一定好？都未必㗎。」

錢唔多「夠用就得」

她說自己工資不高，「好在多工開，尤其是以前拍戲行頭根本好少人。」
可惜不善投資，故財富累積成果平平，「夠用就得，壞咗個電視，我買得起，
朋友組隊去旅行我亦畀得到，咁就足夠啦。」

享受簡樸生活

羅蘭姐芳齡七十有八，還有一年多就可擺八十大壽，「我唔同胡楓，他有兒女有孫仔，
我冇。阿媽九十歲生日，都唔肯擺酒，阿媽唔擺，我有乜理由擺？」11月的生日，
也是教會朋友弄個大蛋糕就當慶祝了，貫徹簡樸的生活態度。

演戲成良緣絆腳石

在她腦海，已經沒有找個強壯臂彎來倚靠的念頭，「唓，你點知個男人會照顧你？
可能激到你紮紮跳，仲衰過自己一個人。」不過話說回頭，她說長年演壞女人，
確實成為良緣的絆腳石，畢竟在舊時代，觀眾真的會以角色來判斷一個人，
「我後生時，有個朋友想將我介紹畀個男仔，點知佢話自己的錢不夠我入電油！」

快樂獨身主義

十多段緣份，全部告終，連談婚論嫁的地步都未到過，「真係整定㗎！」
不過有男人恐懼症的她堅稱冇所謂，「搵另一半唔容易，男人呢，廿幾歲鍾意廿幾歲女仔，到咗八十歲，都係鍾意廿幾歲女仔……」

獨身主義當道，已經獨居多年的羅蘭說，最緊要保持廣闊的朋友圈子，就不會感到寂寞，「我在電影圈、電視台、教會都各有一班朋友，唔拍戲都好忙。做人一定要開放些，
不要等朋友約，自己不妨去主動約人，所以能否過快樂的獨身生活，好視乎性格。」

龍婆經典聖羅蘭潮爆

羅蘭原名盧燕英，16歲入行，專做反派、二線角色，但越老反而越受觀眾歡迎，
2000年電影《爆裂刑警》憑四婆一角連奪香港電影金像獎、香港電影評論學會
最佳女主角及再奪第五屆金紫荊獎最佳女配角，成為最年長的影后，
「龍婆」與「聖羅蘭」更是連九十後都唔會話out。狐狸精已經修成正果。

07年因感年事已高，記憶力大不如前，實行半退休，做義工、去旅遊，
但她說真有戲癮這回事，「睇添哥（李添勝）、祥仔（黎耀祥）的劇，睇到我心思思。」
一年前重返TVB，成為最搶手甘草演員。

屹立娛圈逾半個世紀，豈會無因？羅蘭姐示範了為人處世之道：牙齒當金使。
譬如說，答應記者擠出時間拍照，以為只是「得閒飲茶」的隨口噏，
但原來羅蘭真會切實地記住，抽到空檔就主動來電，實踐諾言。

羅蘭姐還深諳日行一善，竟然對攝影哥哥說：「你咁靚仔，應該去做明星。」
逗得哥仔笑得見牙唔見眼，拍照份外落力。不花分文的高回報投資，就是如此。