進入接受嘅階段？

呢幾日冇寫blog，因為真喺唔知寫乜；寫嚟寫去都喺三幅皮，所以索性閉關自修，消化吓丈夫講嘅最後說話希望可以盡快接受同執行，同埋睇吓blog友寫嘅文章，從中學習同舒緩吓自己嘅情緒，真喺獲益良多，冇咁怨，冇咁恨。

呢幾日，我仲要諗吓點安排我細佬同女朋友嚟美國度聖誕同我地自己一家人一年起碼一次嘅滑雪路線，一路踱，一路諗應唔應叫埋丈夫去呢，雖然我仲未知道應該點面對可以講出咁絕咁自私說話嘅人，但喺佢始終好錫小朋友，所以就寄咗封電郵邀請佢一齊去，心諗最多到時冷淡D，唔理，唔望，唔同佢講野咁咪OK囉，雖然後來佢冇話實會嚟，但喺我居然冇失望，可能因為已經對佢冇期望；開始進入"接受"嘅階段？

尋日香港細佬話我知，丈夫要佢買野，都唔知個樣喺點，所以買唔到，橫點睡唔到覺，於是就上網搵，搵咗個幾鐘，最終俾我搵到，初初諗住幫佢定購埋，不過喺台灣網站，所以唔送貨到海外，冇計喇，唯有發送物件個樣俾細佬，咁佢咪易搵D囉，仲叫我朋友如果我細佬買唔到就幫我上網定購。一路搵嘅時候，自己喺度諗，你仲關心佢咩？答案喺"唔知呢！"，淨係諗住幫到佢就算啦，我諗我喺進步咗，冇咁計較，冇咁自我，定係我開始放低佢，冇愛，冇感覺，所以唔會小氣同自私呢？答案又喺"唔知呢！"。

其實兩個人相愛相處，好似朱茵喺志雲飯局入面講，兩個人相處"忠誠"同"信任"好重要，會"佔有"對方，唔會做D傷害或令對方唔信任嘅野，咁我地現時嘅情況又喺唔喺因為"忠誠"同"信任"或"佔有"出咗問題呢？。。。 唉！始終不能釋懷，想尋根究底問題喺邊，喺因為我唔甘心定喺我仲係度想解決問題同佢喺番埋一齊？。。。 唔諗喇。。 要睡覺喇。。。因為聽日一早要同公主去面試同考試呀！。。。 唉！提醒自己要謹記佢最後嘅判決，唔可以再胡思亂想，如果唔喺我就唔可以步入"接受"嘅階段喇。